bigatin

Round 2 Fight!

2009-09-17T11:21:00.001-07:00

Hating-gabi.

Abala na naman kami ni Jose sa harap ng computer nang marinig namin ang tunog ng paa ni Sisa sa ikalawang palapag. Sa nangyaring trauma sa kanya nung unang laban, bigla siyang kinabahan at 'di mapakali sabay bulong kung okay lang ba na nandirito siya.

Panatag akong nasermonan na si Sisa ni Kikay dahil binalitaan ko sa nangyari nung unang laban. Akala ko, alam na niya na tumatambay na naman si Jose sa bahay at binalewala na lamang niya ito. Pero mali, nagliparan ang mga gamit habang pasigaw na pinapaalis si Jose. Hindi agad tumayo si Jose dahil nabanggit ko na sa kanya kung ano ang gagawin pag nagkatopak na naman itong si Sisa. Panatag ako at palaban sa mga naihanda kong mga salawikain at salaysay ngunit sadyang napakunat at makapal mukha itong si Sisa at patuloy pa rin sa pagpapalayas sa kawawa kong kaibigan.

Madalang lang akong nagsalita at halos naka mute volume na yung boses ko sa una kaya hindi siguro narinig yung mga sinasabi ko at patuloy ang mga pagtapon ng masasamang salita sa akin na kasing-tunog ng "makapal ang mukha", "layas", at "tapon".

Malala na itong si Sisa. Di nakakapagtataka na sa aming magkakapatid, sa kanya yung tronong "psycho" at sa akin naman yung "kiko" dahil namana ko yata yung katangian ng erpat ko na pang-kapayapaan! Ito ang gusto ko!

Mahilig magtapon ng bagay itong si Sisa lalo na pag galit. Umakyat na siya at panay bato ko pa rin sa kanya ng mga mapatalinghagang salita na kasingtunog ng "psycho" at "mukhang pera". Naka volume 11 na yung boses ko nun. Sa may hagdanan, nailagan o kaya'y 'di tumama sa akin yung basurang itinabi niya sa may hagdanan. Bumalik na ata siya sa kuarto at ako nama'y nabitin sa mga naiwang punchlines at 'di mapakali dito sa baba.

Nang marinig ko ang yapak niya pababa ng hagdanan, 'di ko na sinayang yung pagkakataong batuhin ko siya ng tinapay ngunit ako'y parang bato na hindi niya nakita sabay kuha sa may kabinet at itinapon ang kanyang sirang digital camera sabay sabi "bayaran mo yan!"

Nag-kabatuhan kami nang mga salita at tulad ng dati, 'di na namin marinig yung mga boses maliban lamang sa mga salitang katunog ay "layas", "pera", "psycho" at "tapon". At naging tahimik uli ang buong mansyon.

Tinawagan ko si Yoyong, na kasalukuyan ay nasa aming bukirin, at ikinuwento sa kaniya ang nangyari. Ganun din, binalita ko si Kikay pagkatapos sa ilang minutong pagsubok na tawag sa Skype ay pumalpak pa yata itong kanyang telepono at nagkalowbat kaya nung pag-uwi na lang niya kami nagkausap.

Saan kaya hahantong ang labanang ito? Lalabas na kaya ang Hadoken ko o mauuna pa muna si Son Goku?

Mamayang umaga..

Ang aking pakikipag areglo sa isang pyscho...... ABANGAN!

Jose : Ang Pagsasalarawan

2009-09-13T11:10:00.000-07:00

Dati nang kaibigan simula nung bata pa kami. Isa sa mga pangarap niya ang magkaroon ng banda at mahilig sa computer. Minsan matigas ang ulo at malakas ang paniniwala sa sarili. Malambing sa babae, kakalimutan minsan ang kumpare. Kahit ganun pa man, kakwela sa kalokohan, ka musikabarkadahan, katropa, at karamay.

Katangian: mabait naman at matalino
Talento: pagkanta, pagtatambol, programming
Kinasusuklaman: ang kanyang lola (minsan) na laging nangtitrip sa kanya
Lahi: 'Gik

Sisa : Isang Mabilis na Paglalarawan

2009-09-10T10:49:00.000-07:00

Si Sisa ay pangalawa sa pitong magkakapatid at nakatapos ng kurso (una) sa larangan ng saykolohiya at (ngayon) narsing na kamakailan lamang ay pumasa sa board exam.

Matalino ngunit marunong magtanim ng galit. May mga taong ayaw niya at ayaw rin sa kanya. Bayolente at agaw-eksena kung magsisigaw.

Dati nang napalayas sa apartment ng eldest namin dahil sa masamang ugali nito na ikinagagalit ng kanyang matalik na kaibigan at natuloy na sa cold war.

Ilang taon nang walang trabaho at kamakailan lamang ay nagpa-enrol ng caregiver at ilang taong nakalipas, tumuloy sa kursong narsing at natapos naman niya.

Katangian: masama pero patago, matalino, saradong pag-iisip, pyscho
Talento: paghihingi ng pera sa erpat, pagmamaskara, pagsasa-psych
Kinasusuklaman: pinakabunso, barkada ng aming pinakabunso, sigarilyo na ginagawa ni bunso
Lahi: tao ngunit impakta pag nagalit

Round 1 Fight!

2009-09-09T06:29:00.000-07:00

Kanina, bandang ala-una ng madaling araw sa loob bahay...

Habang abala kaming dalawa ng kapitbahay kong si Jose sa harap ng computer, bigla na lang sumugod si Sisa at galit na galit na pinapalayas ang kaibigan ko. Siyempre, nagulat kaming dalawa at napahinto sa aming kinaaabalahan. Nahiya ako dahil pinagtitripan ni Sisa si Jose. Si Jose ay isa sa mga pinakamatalik kong kaibigan mula nung kami'y nagbibinata pa lamang. Kaya ganun na lang ang galit ko kay Sisa at sinigawan ko rin siya! Bakit bigla na lamang ang buhos ng galit niya samantalang dati'y dito na tumatambay si Jose? Naitanong ko sa kanya at agad naman itong sumagot si Sisa ng pasigaw.

"RRRRAAAAAAAAAAAAAAAAAAAAAAAA!"

Siyempre wala kang maiintindihan kung di ka sanay sa mala-sirenang boses niya. Ang pag-iwan ng mga abo ng sigarilyo sa ash tray ni Jose kagabi ang nakita ni Sisa kaninang umaga kaya gayon na lang ang galit niya sa kaibigan ko.

Makapal daw ang mukha nitong si Jose na parang sino kung pumasok dito sa bahay na daig pa'y nakatira mismo dito sa bahay. Syempre, inimbita ko siya dahil mula nung nag homebased na ako, ako lang mag-isa dito at okay sa akin yung pagbibisita ng mga katropa ko. Dati nama'y tumatambay na si Jose sa bahay. at normal lang din ang kaniyang kilos at nagpapaka-comfortable kase sabi ko nga "feel at home lang bai tulad ng dati."

Nakakapagtataka lang kasi dati nama'y tahimik kaming nagkukuwentuhan nina Jose at Carlos na may kasamang beer at sila'y nagyoyosi habang si Sisa ay naaaliw sa paggamit ng computer ko at nagpapa-harvest sa kanyang farm town. Minsan na nga rin lang ako nakikipagsabayan sa mga kababata ko dahil dati madalas abala ako sa trabaho nung pumapasok pa ako sa opisina.

Pero nung gabi na yun, naghasik ng lagim itong si Sisa. Ang kawawang Jose, kusa na lang umalis sabay humingi ng paumanhin.

Nagalit ako kay Sisa sa ginawa niyang pambabastos sa matalik kong kaibigan! Sa luwag ng sala at nag-eecho pa, kulang na lang mag-aalarma ang kampo na parang sinalakay ng mga rebelde. Yung bahay kase namin katabi lang sa kuta ng mga sundalo.

Nagpupumigil ako. Nanginginig na umiinit yung kamay ko na parang magkakaroon ako ng hadoken at ihahadoken ko sa kanya! Yun yung pinakaunang beses na umabot ang boses ko ng volume 12 na dati'y nasa 11 lang pag may konting tampuhan kaming magkapatid.

Pero nung oras na yun, tuluyan nang nawala ang respeto ko sa kanya bilang nakakabatang kapatid. Pambabastos na nagdulot ng pansamantalang trauma sa kaibigan ko ang ginawa niya at pati ako'y parang tinanggalan na ng karapatan bilang kapatid at gusto pa niya akong palayasin sa sarili naming bahay!

Nagbalak siyang itapon ang mga computers at iba pang mga gamit dito sa bahay 'pag nakita pa niya ito kinabukasan. Nagsasagutan kami na halos hindi na namin marinig ang aming mga sinasabi.

Natapos ang aming sigawan nung gabing iyon nang siya'y umakyat sa kanyang kuarto at nag iwan ng mga salitang katunog ang "layas" at "tapon".

Napansin ko at siyempre, tulad ng mga ginagawa niya dati sa apartment ng eldest ate namin, nagkukulong na naman siya sa kuarto at lumalabas lamang pag may lakad o nag iinit ng tubig sa kusina dito sa baba.

Tuloy pa rin ang pag bisita ng mga katropa , ka-bloggers, at ka-bikers ko dito sa bahay habang ang tunog ng kanyang mabibigat na paa sa taas ang nagpapatunay na may buhay sa ikalawang palapag.